Tripura Chief Minister tur la chiang lo

Tripura assembly inthlanah rorellai, BJP leh a thawhpuite chu thlan tlin an ni leh a, mahse sorkar thara chief minister tur hi sawichian a la ni lo.

Inthlanah hian assembly seat 60-ah BJP leh a thawhpuite hian seat 32 an la a ni.

Chief minister ṭanglai, Manik Saha chu inthlan dawn khan BJP-in chief minister tura a hmatheh ni mah se, result puan a nih hnuah central lama BJP hruaitute chuan CM tur hi an ngaihtuah ṭha leh dawn nia sawi a ni.

Tripura chief minister thar tura sawi zingah hian union minister of state for empowerment and social justice, Pratima Bhoumik chu a langsar hle. Ruat a nih chuan Bhoumik hi Tripura chauh ni lo, hmarchhak bialah hmeichhe chief minister ni thei hmasa ber a ni ang.

Bhoumik hi CM-a dah a nih chuan, Tripura CM kalchhuak tur Manik Saha hi sorkar laipui lamah dahluh a nih rin a ni bawk.

Kum 53 mi, Pratima Bhoumik hi West Tripura constituency aṭanga Lok Sabha member-a thlan tlin a ni. Kum 1991-a BJP a zawm a, party tha tichaktu pawimawh tak a ni chho ta zel a ni. Tripura-a hmeichhe BJP MP ni thei hmasa ber leh, Tripura leilung fa zinga union minister ni thei hmasa ber a ni bawk a ni.