PM Modi-a'n hmarchhak state 3 tlawh dawn

Prime minister Narendra Modi chuan hmarchhak state pathum - Meghalaya, Nagaland leh Tripura-a sorkar thar lakluh hun chu a hmanpui vek dawn nia sawi a ni.

State pathuma sorkar tharte hi tunkar hian lakluh fel an ni dawn a, sorkar tharah hian BJP chu roreltu lamah an tel vek a ni.

Meghalaya

Meghalaya-a National People's Party (NPP) kaihhruai ṭangrual sorkar chu March 7-ah lakluh a ni dawn tih NPP MLA Prestone Tynsong chuan a sawi.

Deputy chief minister hlui, Tynsong chuan NPP national president, Conrad K Sangma chu Meghalaya chief minister atan lakluh a ni dawn tih a sawi bawk.

Meghalaya-a ṭangrual sorkar thar lakluh inkhawm hi prime minister Narendra Modi bakah union home minister Amit Shah leh Assam chief minister, NEDA convenor ni bawk Himanta Biswa Sarma ten an hmanpui dawn a ni.

NPP hian inthlan neih zawh takah khan seat 26 lain party mala seat la hnem ber a ni. Mahse sorkar siam tura seat ngai zat a nei pha lo a, hei vang hian party dang a thawhpui dawn a ni. Tynsong chuan BJP MLA 2, HSPDP MLA 2 bakah independent MLA 2-ten NPP kaihhruai sorkar hi a thlawp a, sorkar siam tura MLA neih ngai zat 32 chu an tlin tih a sawi.

Nagaland

Nagaland-a NDPP leh BJP thawkdun chuan a term hnihna atan sorkar an siam leh dawn a, March 7 ah lakluh an ni ang.

NDPP-BJP hian assembly seat 60-ah MLA 37 an nei a ni. NDPP hian MLA 25 neiin BJP hian 12 a nei a ni.

Prime minister Narendra Modi bakah central-a BJP hruaitu leh chief minister eng emaw zatin Kohima-a sorkar thar lakluh inkhawm hi telpui an tum.

Kar liam ta Zirtawpni khan NDPP legislative party leader atan Neiphiu Rio chu lungrual taka thlan a ni. Ṭangrual sorkar tharah hian Chief Minister a term nga-na tur a chelh leh dawn a ni.

Tripura

Tripura-a BJP-IPFT ṭangrual sorkar chu March 8 ah lakluh a ni ang.

BJP hian assembly seat 60 awmah seat 32 lain, a thawhpui IPFT hian seat 1 a la.

Sorkar thar lakluh inkhawm hi Agartala-a Viivekananda ground-ah neih a ni dawn a, Assam chief minister leh NEDA chairman Himanta Biswa Sarma pawhin a hmanpui dawn a ni. BJP sorkarna state hrang hranga chief minister-te pawh sawm an ni tih BJP state vice president Rebati Tripura chuan a sawi.

Inthlan result puan hnuah Tripura chief minister tur hi sawichian a nih mai loh avangin an thlak dawn nia sawi thawmte a awm a, mahse chief minister Manik Saha chu CM-ah a awm chhunzawm leh dawn a ni.