Sikkim-in nu 16,000 hnenah Rs 20,000 ṭheuh sem

Sikkim sorkar chuan state sorkar flagship programme, mothers' (housewives) welfare schema hnuaia hamṭhatna dawng tura thlan, nu 16,000 te hnenah Rs 20,00 ṭheuh a sem.

Kar liam ta Zirtawpnia Pakyong district-a Rangpo-a hun buatsaihah, hamṭhatna dawng tur zinga 32 te chu Rs 20,0000 cheque pek an ni a, a bak nu 15,968 te chu an bank account a thunsak emaw, block divisional officer te kaltlangin emaw pek an ni ang.

Chief minister Prem Singh Golay ruahmannaa scheme siam hnuaiah hian, kumtinin constituency tina nu 500 zel chu chhawmdawlna hi pek tum a ni. Rangpo-a hun hmanah CM hian cheque te hi a hlan a ni.

Chief Minister chuan Rs 20,000 an sem chu kum 2022 pual ami a ni tih sawiin, an sum pek zat hi tihpun chhoh zel a tum a, Rs 50,000-60,000 thlengin a la pung dawn a ni, a ti. An sum sem chu an pasal emaw, an pasal te hnenah hlan a ni dawn lo tih sawiin, sum hmansual tur venna kawngah nute chu an rintlak zawk a ni, a ti

Scheme an siam chungchang pawh sawifiahin CM chuan, "A bikin thingtlang lama cheng nute chuan sum lakluhna tur an nei ve lo. Rs 20,000 hi an pual tur a ni. An mimal mamawh atan, an fate zirna leh an chhungkaw tan an hmang thei ang," tiin a sawi.