Manipur : Ruihhlo donaah MLA-te 'warrior' nihna pe

Manipur sorkarin an state-a ruihhlo do beihpui a thlak mekah, chak zawka hma a lak zel theihna turin, MLA zawng zawngte chu 'War on Drugs' campaign-na atan 'warrior' ah ruat vek an ni.

Kar liam ta Zirtawpni khan state assembly chuan MLA 60-te 'warrior' nihna pekna tura private resolution lut chu an pass a ni. Party hrang hrang MLA-te chuan he resolution hi lungrual takin an pawm. Resolution pass hma hian chief minister N Biren Singh bakah House member eng emaw zat chuan ruihhlo do ṭulzia an sawi bawk. CM chuan MLA tinte chu Manipur aṭanga ruihhlo umbo a nih theihna turin tualchhung mi, khaw hotute leh pawl hrang hrangte nena nasa zawka hma la turin a chah.

Manipur sorkar chuan an state-a ruihhlo hluar zel avangin 'War of Drugs' hi a kalpui mek a, ramri kaltlanga an rama ruihhlo tawlhluh pawh tam tak man a ni tawh. Hei bakah hian state chhung hmun eng emaw zatah poppy chinna hmunte tihchhiat a ni a, poppy chingtute tan eizawnna dang siamsak dan tur pawh an ngaihtuahpui a ni.

Chief Minister Singh chuan ruihhlo kaihhnawiha mante chu ang khata en vek an ni dawn tih sawiin, political party, hnam leh an nihnaten a hum thei dawn lo a, dan angin an chungthu rel zel a ni ang, a ti. Ramri ven hna pawh uluk zawka kalpui a ni, a ti.

Sorkarin ruihhlo do beihpui a thlak hnuah ruihhlo kaihhnawih thubuai 300-400 vel awm court-ah ziahluh ni tawhin, mi eng emaw zat man an ni tawh bawk. Man zingah hian ruihhlo tawlhrukna kawnga hotu ber berte pawh an tel.