Nagaland-ah eptu awm lohna sorkar ding dawn

Nagaland chu political party hrang hrang tamna ber zinga mi ni mah se, party zawng zawng deuhthawin National Democratic Progressive Party (NDPP) leh Bharatiya Janata Party (BJP) ṭangrual sorkar thar ding tur chu an thlawp dawn tih an sawi a, hei vang hian eptu awm lohna sorkar a ding leh thei dawn nia hriat a ni.

March 2-a state legislative assembly inthlan result tihchhuahah khan, NDSPP leh BJP hian assembly seat 60 awmah seat 37 an la a ni. Nationalist Congress Party (NCP) chuan seat 7 lain, National People's Party (NPP) in seat 5, LJP (Ram Vilas), Naga People's Front (NPF) leh RPI(Athawale) in seat 2 ṭheuh leh, JD (U) in seat 1 bakah independent candidate-in seat 4 an la bawk. Tun ṭum hi Nagaland assembly inthlana political party hrang MLA awm tam ber ṭum niin, LJP(RV) leh RPI(Athawale)-te hian Nagaland-a MLA an neih ṭum khatna a ni bawk.

NDPP-BJP hian ṭangrual sorkar thar an siam leh dawn a; LJP (Ram Vilas), RPI (Athawale), JD(U) chuan ṭangrual sorkar thar an thlawp dawn tih an sawichiang tawh a, Inrinni liam ta khan NCP pawhin Neiphiu Rio kaihhruai NDPP an thlawp dawn tih an sawi bawk. NPF general secretary Achumbemo Kikon pawhin an party chuan thutlukna la siamfel chiah lo mah se, an party chuan sorkar thar hi thlawp an tum tih a sawi. Political party dangten NDPP-BJP hi thlawp an tum thu an sawi tak vek avangin, Nagaland-ah hian all-party government a ding leh thei dawn a ni.

Kum 2015 leh 2021 khan eptu awm lohna sorkar a lo ding tawh bawk a, mahse tun ṭum hi House-a sorkar thar lakluh a nih hmaa eptu awm lohna assembly a awm ṭum khatna tur a ni ang.