Railways-in hmarchhakah 'Bharat Gaurav' tourist train tlantir dawn

Indian Railways chuan hmarchhak bialah “North East Discovery: Beyond Guwahati” tih kalpui a tum a, tour package siamin Bharat Gaura Deluxe AC tourist train a tlantir dawn.

Bharat Gaurav train hi security feature - CCTV camera nena thuam niin, pindan tina security guard dah vek an ni. Fully air-condition niin, AC I leh AC II a awm a, dining restaurant pahnih, kitchen, pindan tinah shower cubicle, sensor-based washroom, foot massager leh mini library-te a awm bawk.

Tourist train hi March 21-ah Delhi Safdarjung rel station aṭangin a chhuak ang a, khualzinte hian Assam-a Guwahati, Sivasgar, Jorhat leh Kaziranga-te bakah, Tripura-a Agartala leh Udaipur, Nagaland-a Dimapur leh Kohima, Meghalaya-a Shillong leh Cherrapunji-te chu ni 15 chhungin an tlawhkual dawn a ni.

Zin kualna atan hian ni 15 leh zan 14 an hmang dawn a, Guwahati-ah chawl hmasa berin khualzinte chu Kamakya Temple leh Umananda Temple tlawhpui an ni ang a, Brahmaputra lui an tlawh bawk ang.

Sivasgawr-a Shiva temple bakah heritage site dangte tlawhpui an ni dawn bawk a, Jorhat-a tea garden tlawhin, Kaziranga-ah zan an riak dawn a, Kaziranga National Park-ah jungle safari neihpui an ni dawn bawk a ni.

Deluxe AC tourist train hian Assam aṭang hian Tripura-a Furkating rel station panin, Unakoti heritage site leh Ujjyayanta Palace-te bakah, Udaipur-a Neermahal palace leh Tripura Sundari mandir-te an tlawh leh ang.

Tripura aṭangin Nagaland an pan leh dawn a, Dimapur station aṭangin khualzinte chu bus-in Kohima panpui a ni dawn a, tualchhunga hmun pawimawhte an tlawh bakah, Naga-te nunphung hriatnan Khomoma village pawh an fang dawn a ni. Heta aṭang hian Guwahati lam pan lehin, khualzinte chu motor-in Shillong panpui an ni ang a, Umiam Lake-te tlawhin Cherrapunji, Shillong Peak, Elephant Falls, Nawkhalikai falls leh Mawsmai cave-te an tlawh ang. Cherrapunji aṭang hian Guwahati station-ah letin, heta aṭang hian tourist train hian Delhi lamah a kir leh dawn a ni. Tourist train hmanga zin khawthawngte hian ni 15 chhungin km 5,800 vel an kalkual hman dawn a ni.

Tourist train hmanga hmarchhak tlawhkual tur hian AC 2 tier-ah mi pakhat tan chuan man Rs 1,06,990, AC 1 (cabin) ah Rs 1,31,990 leh AC 1 (coupe)-ah Rs 1,49,290 a ni ang. Hei hian hmun hrang hrang an tlawhkualna leh, zana hotel-a riahna, ei leh in (vegetables only) bakah sight-seeing an neihna, travel insurance leh guide rawih mante a huam tel vek ang.