Meghalaya leh Nagaland-ah ṭangrual sorkar thar lalut

8th March, 2023

Meghalaya leh Nagaland-ah nimin khan ṭangrual sorkar thar lakluh a ni. Meghalaya-ah National People's Party (NPP) kaihhruai sorkar thar a ding a, Nagaland-ah eptu pawl awm lohna sorkar din a ni bawk.

State pahniah sorkar thar lakluh inkhawm hi prime minister Narendra Modi chuan a hmanpui ve ve a, union home minister Amit Shah leh BJP national president JP Nadda-ten an ṭawiawm bawk. Vawiin hian Tripura-a BJP kaihhruai sorkar thar lakluh inkhawm hmanpui turin a kal leh ang.

Meghalaya

National People's Party (NPP) hruaitu, Conrad K Sangma kaihhruai ṭangrual sorkar thar chu nimin khan lakluh a ni.

Meghalaya governor Phagu Chauhan chuan Conrad Sangma chu chief minister term hnihna chelh turin a lalut a, council of minister atan mi 11 lakluh an ni bawk.

Deputy chief minister atan NPP MLA pahnih, Prestone Tynsong leh Sniawbhalang Dhar-te lakluh an ni bawk a, minister lakluh zingah hian BJP aṭangin Alexander Laloo Hek, UDP MLA Paul Lygndoh leh Kyrmen Shylla bakah HSDPD aṭangin Shakliar Warjri te an tel.

Council of minister 11 zingah NPP aṭangin pasarih, UDP aṭangin pahnih leh, BJP leh HSPDP aṭangin pakhat ve ve an tel.

Nimina ṭangrual sorkar thar lakluh inkhawm hi prime minister Narendra Modi, union home minister Amit Shah leh BJP president JP Nadda-ten an hmanpui.

NPP kaihhruai ṭangrual sorkar hian member 60 awmna assembly-ah hian thlawtpu 45 a nei a ni.

Nagaland

Nagaland-ah NDPP-BJP thawkdunte chu assembly inthlan neih zawh takah sorkar thar siam thei tura thlan tlin a ni. Hetih lai hian political party dangte pawhin ṭangrual sorkar thar hi an thlawp dawn tih an sawi tak vek avangin,eptu pawl awm lohna sorkar a ding leh ta a ni.

Kohima-a Capital Cultural Hall-ah chawhnu dar 1:30-ah Nagaland Democratic Progressive Party (NDPP) hruaitu Neiphiu Rio chu a term 5-na turin Nagaland chief minister atan lakluh a ni. Deputy chief minister atan BJP legislature party (BLP) leader atana thlan, Yanthungo Patton leh NDPP MLA Taditui Rangkau Zeliang-te chu lakluh an ni bawk.

Prime minister Narendra Modi chuan Shillong aṭangin Kohima hi panin, Nagaland sorkar thar lakluh inkhawm hi a hmanpui ve leh nghal a ni. Ani bakah Assam, Manpour, Arunachal Pradesh leh Sikkim chief minister-te pawhin an hmanpui ve bawk.