Assam : Cachar centre-a exam-ten an entawn nasat vangin exam ṭha dawn

Assam-a Board of Secondary Education (SEBA) chuan board exam neih mekah, Ganirgram, Cachar-a JR Higher Secondary School centre-a exam-te chuan an entawn nasat avangin exam ṭha leh turin a ti. He centre-ah hian zirlai 760-ten an exam a ni.

Kar liam ta Zirtawpni khan social media lamah video eng emaw zat a darh a, hetah hian Cachar centre-a zirlai exam-te hnenah mi ṭhenkhatin an entawn an sem kual laite a lang a ni. Chief minister Himanta Biswa Sarma chuan he thil thleng chungchangah hian State Education Board chu rang taka ngaihven a, a ṭul anga hma la turin a hriattir nghal bawk. Police-te chuan video darhte hi an zirchian hnuah, mi panga an man tawh a ni.

Thawhṭanni khan SEBA chuan thuchhuah siamin, March 3-a English subject exam laiin centre no. B23-0138, J R Higher Secondary School-a exam, candidate eng emaw zat chuan dik lo takin thil an kalpui a ni tiin, zirlai ṭhenkhatte tihdik loh vang hian he centre puma exam zirlai 760-te chu English subject exam ṭha leh vek tura tih an ni, a ti.