AP MLA Ering-a'n Chinese CCTV camera khap turin ngen

Arunachal Pradesh MLA ṭanglai, MP hlui ni bawk Ninong Ering chuan prime minister Narendra Modi hnenah lehkha thawnin, India ramah Chinese CCTV camera hman khap turin a ngen.

Ering hian PM hnena ngenna a thawnah hian, India rama media house lian pakhatin article a tihchhuah, 'The China snooping menace' tiha China siam CCTV-te chu a him tawk lo thei a, hetih lai hian India ram hmun hrang hranga hman mek an nih hlawm avangin China tan India ram enthlakna hmanrua a ni thei tih a tarlan chungchang pawh a sawilang a ni.

AP MLA chuan India ramah CCTV camera hi maktaduai hnih chuang vel hman niin, heng zinga 90% chuang chu China sorkar hnuaia company-te siam a ni tiin, China siam CCTV hman mek zinga a zatve aia tam hi sorkar department-ah vuah a nih vangin ngaihtuahzui a ngai hle tih a sawi. CCTV-te chu awlsam taka khawih danglam a, thil ṭha lo tihna atana hman theih tih an lo sawi fo avangin, India dodaltute tan enthlakna hmanruaah an chang thei a ni, a ti.