Tripura CM atan Manik Saha lalut

Tripura legislative assembly inthlan neih zawh taka hnehna an chan hnuah, Manik Saha chu nimin khan a ṭum hnihna turin chief minister atan rinawmna thu tiamtira lakluh a ni.

Agartala-a sorkar thar lakluh inkhawm hi prime minister Narendra Modi, union home minister Amit Shah leh BJP national president JP Nadda-ten an telpui a ni. Anni bakah Assam chief minister leh NEDA convenor Himanta Biswa Sarma, Arunachal Pradesh chief minister Pema Khandu, Manipur chief minister N Biren Singh leh Sikkim chief minister PS Tamang-te pawhin an telpui bawk.

Manik Saha rual hian a minister tur mi pakuate lakluh an ni bawk a, an zinga pali chu sorkar hmasaa minister lo ni tawhte niin, mi thar panga an tel. Mi thar lakluh zinga pali chu BJP MLA niin, pakhat chu BJP nena ṭangrual sorkar siamtu, Indigenous People's Front of Tripura (IPFT) MLA a ni. Minister atana lakluh zingah hian hmeichhia pakhat a tel.

BJP hian party mala seat la hnem ber dawttu, regional party ṭhangduang tak Tipra Motha chu ṭangrual sorkara tel turin inbiakna a la neihpui mek a, an tan hian ministerial post pathum a dah a ni. Tipra Motha hian MLA 13 an nei.

Inthlan kaihhnawiha state chhung hmun hrang hranga buaina chhuak vanga lungawi lohna lantirin, nimina sorkar thar lakluh hi eptu pawl, CPM leh Congress chuan an boycott.

Kum 70 mi, chief minister Manik Saha hi kum 2022-ah Biplab Deb thlakin CM atan lakluh a ni a, CM a nih hma hian inthlanah a la chuh ngai lo. CM a nih hnuah Town Bardowali seat-a by-election neihah MLA atan thlan tlin a ni. Saha hian Congress party chhuahsanin kum 2016 khan BJP a zawm a ni.

Sorkar thar lakluh a nih hmaa chief minister thar tur nia a hming sawilan hman, union minister Pratima Bhoumik chuan MLA aṭanga thlan tlin a nihna, Dhanpur assembly bial chu chhuahsanin MP-ah a awm chhunzawm zawk dawn a ni.