Arunachal : Deputy CM-in 2023-24 state budget a pharh

Arunachal Pradesh Assembly budget session neih mekah, Thawhlehni khan deputy chief minister Chowna Mein chuan 2023-24 state budget a pharh a, sum indaih lohna tur hi Rs vbc 758.26 a tling.

2023-24 state budget atan hian Rs vbc 29,657.16 ruahman niin, kum 2022-23 budget aia a tamna hi 14% a tling a ni.

Finance, Planning and Investment ministry enkawltu ni bawk, Dy CM Mein chuan darkar hnih chuang budget speech neiin, 2023-24 budget chu pillar paruk - ‘Governance Reforms and Prudent Financial Management’, ‘Synergy and Convergence’, ‘Investment in Health Sector’, ‘Investment in Human Capital’, ‘Atma-Nirbhar Arunachal Pradesh’ leh ‘Environment Protection and Climate Resilient Development’-ah a innghat tih a sawi. Hengte hi state economy ṭhanna tur leh, a bikin ṭhalaite eizawnna remchang siamsakna tur a ni, a ti.

Ṭhalaite beisei angte tihhlawhtlin a, mahnia eizawnna tur remchang siamsak zel te, inkalpawhna lama changtlung zawka siamna tura infrastructure lamah investment tihte chu Arunachal Pradesh state nuam leh hausa zawk siamna tur lungphum pawimawh tak a ni, tiin Mein chuan a sawi.

Dy CM chuan state GSDP chu kum 2015-16-a Rs vbc 20,373 chu kuminah chuan a let dawn, Rs vbc 39,000-ah a pung chho tawh a ni, a ti. Kum ruk liam ta chhungin chhungkaw per capita income chu Rs 88,768 aṭangin Rs 1,15,902-ah a pung chho tawh bawk a ni, a ti.

2023-2024 budget-ah hian road connectivity hmanga border area tihhmasawnnate leh power project-te chu dah pawimawh zingah tel in, Mein chuan border area tihhmasawnna tura ruahmanna hrang hrang, mipuite leh ramria duty armed force-te tana facility dah theih turte pawh ngaihtuah mek a nih thu a sawi bawk.