Meghalaya : Assembly speaker atan Thomas A Sangma thlan a ni

Meghalaya legislative assembly speaker atan nimin khan National Peoples Party (NPP) MLA Thomas A Sangma chu chuhtu awm loa thlan tlin a ni.

Assembly speaker thlan turah hian eptu party pathum - Congress, Trinamool Congress leh Voice of the People's Party chuan candidate an siam ve lo. Protem speaker Timothy D Shiar chuan, nomination paper thehlut dang an awm loh avanign Thomas A Sangma chu Speaker thar turin a puang a ni.

Thomas A Sangma hi Rajya Sabha MP hlui a ni a, tun ṭum assembly inthlanah khan North Tura bialah NPP ticket-a thlan tlin a ni. Speaker atana puan a nih hnua thu a sawiah, House member-ten Speaker ni tlaka an ngai chu lawmawm a tih thu sawi.

Chief minister Conrad K Sangma chuan Speaker thar chu lawmpuina hlan nghalin, Rajya Sabha MP hlui chuan a chanvo hneh takin a kenkawh ngei a ring tih a sawi bawk.

Nimin vek khan National People's Party (NPP) kaihhruai Meghalaya Demoractic Alliance (MDA) sorkar chuan assembly-ah awlsam takin fiahna a paltlang bawk. CM Sangma kaihhruai MDA sorkar hian seat 60 awmna assembly-ah thlawptu MLA 45 a nei a ni. Ṭangrual sorkar thlawptute hi NPP MLA 26, United Democratic Party (UDP) MLA 11 bakah BJP, Hill State People's Democratic Party (HSPDP), People's Democratic Front (PDF) leh independent MLA 2 ṭheuhte an ni.

Thawhlehni khan CM Sangma kaihhruai ṭangrual sorkar thar hi lakluh a ni a, deputy chief minister atan mi pahnih leh minister atan mi pakua lakluh tel an ni bawk. Minister atana lakluhte hi NPP MLA 5, UDP MLA 1, BJP leh HSPDP MLA pakhat an ni a, an chanpual tur erawh tihfel a la ni lo.

Meghalaya council of minister tharah hian hmeichhia pakhat, M.Ampareen Lyngdoh a awm a, non-tribal pakhat Abu Taher Mondal a awm bawk. An pahnih hian NPP MLA ve ve an ni.