Manipur-ah ruihhlo Rs vbc 55 hu man

Manipur-a Teng­noupal district-ah Assam Rifles sipaiten brown sugar, cheng vaibelchhe 55 man hu an man a, a kengtu Myanmar mi pahnih an man tel bawk.

Sipaite hian Indo-Myanmar border bul, H Munnom khuaa routing checking an neihnaah, Thawhlehni khan ruihhlo tam tham tak hi an man a ni. A neitu mi pahnihte hi Myanmar-a Tami khuaa mi an ni. Two-wheeler ah inphurin, brown sugar hi bawm pathumah an dah a, Moreh khua pan an tum tih an sawi.

Brown sugar an man hi kg 27.94 niin, sahbawn bawm 648-ah thuhruk a ni. Ruihhlo leh a neitute hi Moreh police station-ah hlan nghal an ni.

Manipur police-te chuan Thawhlehni vek han Tengnoupal district-ah brown sugar kg 6.12 leh 'World is Yours' tablet kg 4.44 an man bawk.