Manipur-ah hmeichhe hlang luhna tur Sainik School din dawn

Manipur chief minister N Biren Singh chuan an state-ah hmeichhe hlang luhna tur Sainik School din a ni dawn tih a puang.

Chief Minister chuan Koirengei-a mega ex-servicemen rally neihnaah, Bihnupur-ah all girls' Sainik School hawn a ni dawn tih a sawi a ni.

CM chuan a kaihhruai state sorkar chuan sorkar hna laknaah Agniveer-te chu a dah pawimawh dawn tih sawiin, ram tana nunna hlantu, sipaite hriatrengna tur chu ex-servicemen office complex-ah siam a nih tur thu leh, hemi atan hian Rs vbc 3 ruahman a nih thu a sawi bawk. Sipaite chu ram venghimtu, an chhungte zawng ai pawha ram himna dah pawimawh leh ram tana thawk a ni a, hei vang hian mipuiten sipaite zahna lantir leh, theih ang anga lo puih chu an tihtur; an mawnphurhna a ni ve a ni, a ti.

Singh chuan union home minister Amit Shah leh defence minister Rajnath Singh-te chu Manipur-a Agniveer recruitment rally neih an phalsak avangin an chungah lawmthu a sawi nghal bawk. Agniveer-te chu sipai aṭanga an chawlh hnuah, sorkar hna laknaah dah pawimawh an ni dawn a ni, a ti. Agnipath scheme hmanga sipaia lut, Agniveer-te hi sipaia kum li an ṭan hnuah an chawl dawn a, Angiveer zinga 25% chauh chu armed force-ah regular-in an lut chho thei dawn a ni.