Meghalaya CM-in CUET-ah state zirlaite ngaihhnathiam turin ngen

Meghalaya chief minister Conrad K Sangma chuan academic session kal mekah university hrang hranga admission ti tura zirlaiten Common University Entrance Test (CUET) paltlang an ngaih chungchangah, an state zirlaite chu ngaihhnathiam turin union education minister Dharmendra Pradhan hnenah a ngen.

Union Minister hnena lehkha a thawnah, CM Sangma chuan state assembly inthlan an neih avangin state board examination pawh sawn a ngaih phah a, hei vang hian CUET exam hmachhawn turin zirlaite chuan inbuatsaihna an nei ṭha hman lo a ni, a ti. CM chuan, 'State chhunga college tam ber chu North Eastern Hill University hnuaia mi an ni a, hei vang hian Meghalaya zirlai tan CUET exam ngai lo tura mi ngaihhnathiam kan ngen a ni," tiin a sawi. State university din turin a kaihhruai sorkar chuan hma a la mek a, Governor hnen aṭanga pawmpuina pawh an hmuh thuai a beisei thu a sawi bawk.

CM Sangma ngenna avangin nikum khan sorkar laipui chuan Meghalaya zirlaite chu CUET exam ngai lo turin a lo ngaihhnathiam tawh bawk a ni.

State assembly inthlan neih vangin Meghalaya Board of School Education chuan Class 12 board exam hun hi sawn hlain, tun thla tawpah exam hi an zo fel thei dawn chauh a ni.

All Nagaland College Students Union pawhin Nagaland University hnuaia college leh autonomous college zirlaite chu CUET exam ngai loa ngaihhnathiam tura nawr turin state sorkar an ngen. Nagaland pawh hi assembly inthlan nei zo hlim an ni a, zirlai pawl chuan state chhung hmun tam taka digital connectivity a mumal loh avangin, zirlaite ngaihhnathiam tura UGC leh union education ministry lama nawr turin state sorkawr hi an ngen a ni.