Nagaland : Congress-in MLA 24-te advisor atana ruatna hnawl turin Governor an ngen

Congress party chuan Nagaland governor La Ganesa hnena state sorkarin department hrang hranga advisor tura MLA thlan thar 24-te a ruatna chu hnawl turin an ngen. Advisor atana ruat an nih hma hian MLA anga lakluh an la ni lo tiin, sorkar chu ram danpui kalphung zawm loah an puh.

State Congress working president Khriedi Theunuo chuan NDPP-BJP chu advisor-te ruat hmanhmawh lutukah puhin, rinawmna thu tiamtira lakluh an la nih loh avangin advisor atana ruatte hi 14th Nagaland Legislative Assembly-a MLA puitling an la ni lo, a ti.

Nagaland-a NDPP-BJP sorkar thar chuan kar liam ta Ningani khan MLA 24-te hi sorkar department hrang hranga advisor turin a ruat a ni.

State legislative assembly inthlan neih zawh takah NDPP-BJP ṭangdun hian assembly seat 60 awmah seat 37-ah hnehna an chang a, hetih lai hian Congress party chuan inthlanah hian seat khat mah la loin a artelukawn a ni.

Congress chuan protem speaker atana Mhathung Yanthan ruat a nih dan chungchang pawh an sawichhuak bawk. Theunuo chuan, "Yanthan hi March 9-ah advisor atana ruat a ni a, hetih lai hian March 10-ah protem speaker atan rinawmna thu tiamtir a ni leh chauh a ni. Hei hi tihdanphung kalh a ni a, NDPP-BJP sorkar tharin kaihhruaina dan awmte an palzut hi thil mawi lo tak, pawmzam mai chi a ni lo," a ti.