Arunachal : Itanagar-ah ENNG hel 15 inpe

Arunachal Pradesh khawpui, Itanagar-ah Pathianni khan Eastern Naga National Government (ENNG) helpawl member 15 chu an ralthuamte nen thuneitute kutah an inpe a, an zingah hian an pawl president Toshang Mossang pawh a tel.

Itanagar-a police headquarters-ah hel inpete pual hian 'homecoming' ceremony hman a ni a, he hunah hian chief minister Pema Khandu bakah deputy chief minister Chowna Mein leh home minister Bamang Felix-te pawh an tel.

Assam Rifles sipaite hmalakna hnuaiah helte hi sorkar kutah an inpe a, Itanagar-a an puala inkhawm buatsaihah pawh hian Assam Rifles (North) inspector general, Major General Vikas Lakhera pawh a tel a ni.

Hel inpete hian an ralthuam kawl, China siam MQ series weapon pakua, AK-47 rifle pahnih, China siam pistol pakhat, magazine 19, 7.62 mm ammunition 415, 9 mm pistol mu panga, China siam grenade pali, under-barrel launcher pakhat, walker-talkie paruk an pe lut nghal a ni.

Chief minister Khandu chuan tharum thawhna thlen bansan a, nunphung pangngai zawh tura helte an hmin theih avangin Assam Rifles leh state policce-te hmalakna chu fakin, thil chhinchhiah tlak leh hriatreng tur a ni, a ti. Hel pawl dangte pawhin an tihdan hi an rawn entawn zel a beisei thu a sawi. CM chuan hel inpete chu sorkarin a ngaihtuah chhunzawm zel dawn tih a sawi bawk.