Ruihhlo zuarte'n a thlawnin ruihhlo sem hmasa ṭhin : Meghalaya DGP

Meghalaya director general of police (DGP) LR Bishnoi chuan an state-ah ruihhlo a hluar hle tih sawiin, ruihhlo zuarte chuan ṭhalaite chu a ngawl veitir tumin a thlawnten ruihhlo hi an sem hmasa ṭhin tih a sawi.

DGP Bishnoi chuan ruihhlo hian khawpui chhung chauh ni lo, thingtlang hmun kilkhawr zawk pawh a tibuai mek tawh tih sawiin, hmeichhe ruihhlo khawih pawh an pung nasa tawh hle a ni, a ti.

Ruihhlo zuarte hian tactic hrang hrang hmangin, midangte an chhawr chhawng leh fo tawh a ni, a ti. An sumdawnna a hlawk a, ruihhlo bawihah ṭhalai tam zawk hruai luh tumin a tirah a thlawnten an sem ṭhin a ni, tiin khawtlangah ruihhlo vanga buaina hi a la nasat chhoh zel a hlauhawm thu a sawi.

Meghalaya police-te chuan tun hnaiah ruihhlo an man nasa hle a, DGP chuan nikum chhunga ruihhlo an man chu an state chanchina kum 50 chhunga ruihhlo an man tam ber kum record a ni tih a sawi. Nikum chhung khan Narcotic Drugs and Psychotropic Substances (NDPS) Act hnuaiah thubuai 116 ziahluh niin, ruihhlo kaihhnawihah mi 234 man an ni. Heroin leh ruihhlo dang zuartute motor 60 man niin, ruihhlo an man tam ber hi May-December inkara an man a ni bawk.

Kumina ruihhlo zuar mante lakah NDPC case 35 ziahluh ni tawhin, mi 80 man an ni tawh bawk. Kumina ruihhlo man zingah hian heroin kg 3.2, psychotropic tablet 60,000 te telin, motor 31 leh mobile phone 94 an man tawh bawk a ni.

DGP chuan ruihhlo zuar an man, jail-a dahte chu an rawn chhuah hnuah pawh an zuar nawn leh fo ṭhin a, hei vang hian police department chuan state sorkarah rawtna pawh a thlen tih a sawi. An rawtna thlente hi pawm a nih chuan, police-te chuan ruihhlo zawrh vanga jail tang tawh, an chhuah hnua an chetdan rinhlelhawmte chu an kuta ruihhlo hmuh kher loh pawhin manin jail-ah an dah leh thei dawn a ni.