Manipur-a zirlai pawl hrang hrang chuan an state-a National Register of Citizens (NRC) hman leh, Manipur State Population Commission din phutinThawhṭanni khan nawrh an huaihawt. 
Zirlai pawl - All Manipur Students’ Union, Manipur Students’ Federation, Democratic Students Alliance of Manipur, leh Kangleipak Students’ Association-te chuan an thil phut nawrnan Imphal-ah kawngzawh an huaihawt a ni. Kawngzawhte hi chief minister N Biren Singh chenna in leh Raj Bhavan-ah luh an tum a, mahse security force-ten an lo dang a ni. 
Nawrh huaihawtte chuan an state, a bikin hill district-ah te mihring an pung chak lutuk nia sawiin, poppy chinna hmun a pung nasa bawk a, hei bakah reserved forest area-a dan loa cheng an pung zel bawk tih an sawi. Hei vang hian state sorkar chu ram dang mi, dan loa an state-a lutte dapchhuah hna ngawrh zawka thawk tur leh, heng mite hi an ram lama thawn kir zel tura an phut thu an sawi bawk.
Zirlaite chuan an state-a dan loa lut ṭhin, a bikin Myanmar, Nepal leh Bangladesh aṭanga lutte venna turin NRC leh population commission hi an mamawh tih an sawi. Sakhua leh hnam bil huat an nei lo a, mahse an dan loa lut ṭhin laka ram leh leilung fate venhim leh humhalh chu an duh tih an sawi. 
Manipur Assembly hian kum 2022 khan population commission dinna turin private resolution a lo siam tawh a, state cabinet pawhin pawmpui tawh mah se, hma lak a la ni lo a ni.