HC-in Nagaland-Manipur inkara NH-2 siam May thlaa zo turin hriattir

Gauhati High Court-a Kohima bench chuan Nagaland leh Manipur inkara National Highway-2 siamṭhat hna thawk mektu contractor chu May thla chhungin an kawng siam zo fel turin a hriattir.

Justice Lanusungkum Jamir leh justice Kakheto Sema awmna bench chuan Thawhṭanni khan kawng siam mek chungchanga public interest litigation (PIL) thehluh chu ngaihtuahin, contractor M/S Fortune Groups chu May 30, 2023-ah project hi zo vek turin a hriattir a ni. Hun tiam chhunga an zawh hman loh chuan sum chawi tir an ni dawn tih a sawi.

Court chuan hun pek chhunga hna hi an thawk zo lo a nih chuan, National Highways and Infrastructure Development Corporation Ltd (NHIDCL) hnenah contractor hi blacklist-a telh turin hriattirna pek a ni dawn tih a sawi. Hei bakah hian hna thawh chu a ṭha tawk tur a ni a, Right of Way (ROW) ang takin hna chu thawh tur a ni, a ti.

Kohima (Nagaland) leh Mao (Manipur) inkar, 2-lane kawngpui siamṭhatna tur contract hi kum 2020, September 30 khan Fortune Groups hnenah pek niin, Rs vbc 315.63 sanction a ni. Hna hi kum 2020, November thla aṭanga thawh ṭan a, kum 2022, April 22-ah zawh tura tih ni mah se, tun thlengin thawh zawh a la ni lo.