Disaster relief fund pek turah hmarchhak state 3 an tel
Kum 2022 chhung khuarel chhiatna thleng vanga sorkar laipuiin state pangate hnena disaster relief fund a pek turah, hmarchhak state pathum - Assam, Meghalaya leh Nagaland an tel.
Sorkar chuan tuilian, leimin leh khuarel chhiatna dang thleng vangin state pangate hnenah tan hian chhawmdawlna, Rs vbc 1,816 pek a remti. He chhawmdawlna a pek tur zingah hian hmarchhak state pathum bakah Himachal Pradesh leh Karnataka state an tel bawk.
Union home minister Amit Shah kaihhruaia high-level committee meeting chuan National Disaster Response Fund (NDRF) hnuaia ṭanpuina pekna tur hi an pawm a ni.
Assam hnenah Rs vbc 520.466 pek a ni dawn a, Himachal Pradesh hnenah Rs vbc 230.31, Karnataka tan Rs vbc 941.04, Meghalaya tan Rs vbc 47.326 leh Nagaland tan Rs vbc 68.02 pek a ni ang.
Financial year 2022-23 chhungin sorkar laipui chuan khuarel chhiatna tawk state-te ṭanpuina tur hian State Disaster Response Fund (SDRF) hnuaiah state 25-te tan Rs vbc 15,770.40 leh NDRF hnuaiah state palite tan Rs vbc 502,744 a pechhuak tawh a ni.