Hmarchhak state pathuma chief minister atana lakluh thar, Meghalaya, Nagaland leh Tripura chief minister-te chuan Thawhṭanni khan a hran ṭheuhin prime minister Narendra Modi an hmu.
 Meghalaya chief minister Conrad K Sangma leh Nagaland chief minister Neiphiu Rio-te hi March 7 khan CM atan lakluh an ni a, Tripura CM atan Manik Saha hi March 8 khan lakluh a ni bawk. Heng CM pathumte kaihhruai ṭangrual sorkarah hian BJP an tel vek a ni.
 Sangma leh Rio-te hian PM Modi an hmuh hnuah, union home minister Amit Shah chu a hranin a chenna inah an hmu leh bawk. Amit Shah chuan CM thar pahnihte chu duhsakna lo hlanin, an kaihhruai sorkar thar chuan an state mipuite beiseina an tihhlawhtlin chhoh ngei a beisei thu a lo hrilh.
Sangma hi Meghalaya CM term hnihna atan lakluh a ni a, an party National People's Party (NPP) kaihhruaiin ṭangrual sorkar, Meghalaya Democratic Alliance 2.0 a siam a ni.
 Nationalist Democratic Progressive Party (NDPP) hruaitu Rio hi Nagaland CM term nga-na chelh mekin, Nagaland chief minister ni rei thei ber a ni. BJP nen thawkdunin ṭangrual sorkar an siam a, political party dangte pawhin thlawpin Nagaland-ah hian eptu awm lohna sorkar an din a ni. Saha pawh Tripura CM term hnihna chelh tura lakluh niin, BJP leh Indigenous People's Front of Tripura (IPFT) ṭangrual sorkar a kaihruai a ni.