Manipur CM-in Covid Care Centre thar a hawng "Community transmission a la thleng lo"

Manipur chief minister B Biren Singh chuan Thawhṭanni khan Imphal East district-a Covid-19 Care Centre siam thar a hawng. Manipur-ah hian Covid-19 kaite enkawlna tur centre hi 14 a awm ta a ni. 

CM-in centre a hawn thar hi Lamboikhong­nang­khong-a Manipur Trade and Expo Centre-a siam a ni a, khum 300 a awm a ni. CM chuan centre hawn thar hi a ṭul dan azirin khum 1,000 awm theihna tura tihlen theih a la ni dawn tih a sawi. 

Manipur-ah hian Covid-19 kai an pung chak hle a, hmun danga zin chhuahna nei lo zingah pawh hri kai hi hmuh chhuah belh zel an ni. Hei vang hian Assembly Speaker Y Khemchand Singh chuan an state-ah he hripui hi mipuia darh, community transmission a thleng tawh niin a lo sawi a ni. Mahse CM chuan hri leng hian zual lam la pan zel mah se community transmission a thleng tawh tih finfiahna tur erawh a la awm lo a, hei vang hian hri leng hi mipuia darh tawh tia anga sawi theih a la ni lo, a ti ve thung. 

Hri kai an pun chhoh zel avangin CM chuan mipuite chu Covid-19 an kai a nih pawhin inzep lo a, a rang lama inenkawl vat zawk turin a ngen. Thawhṭannia sample endik zingah mi 89 in hri an kai tih hmuh chhuah belh leh a ni a, an zingah hian Central Armed Police Force panga an tel. Manipur-a hri kai hmuh chhuah hi mi 2,920 an tling tawh a ni. Hri kai zinga pasarihin an thihpui tawh a, mi 1,766 chu enkawl dam an ni tawh.