March 20-ah Nagaland leh Meghalaya budget session ṭan dawn

Ṭangrual sorkar thar dinna pahnih, Meghalaya leh Nagaland legislative assembly budget session chu March 20 aṭangin neih a ni dawn.

Meghalaya

Meghalaya legislative assembly speaker Thomans A Sangma chuan March 20 aṭangin assembly budget session neih ṭan a ni dawn a, March 28 thleng a awm dawn tih a sawi.

Session neih hun tur hi speaker kaihhruai Business Advisory Committee (BAC) meeting, Thawhṭannia neih chuan a pawm a ni.

Speaker chuan session ṭanni hian governor-in thu a sawi dawn a, hemi ni vek hian deputy speaker pawh thlan nghal a ni dawn tih a sawi. March 23 hian chief minister, finance changtu ni bawk Conrad K Sangma chuan state budget a pharh ang.

Session chhung hian ni sarih rorel ni atan hmangin, ni nga chu government business leh ni hnih chu private member business ngaihtuahna atan dah a ni.

Nagaland

14th Nagaland Legislative Assembly session hmasa ber chu March 20-ah ṭanin, ni riat a awh ang.

Chief minister Neiphiu Rio kaihhruai Nationalist Democratic Progressive Party (NDPP) leh Bharatiya Janata Party (BJP) ṭangrual sorkar thar din a nih hnuah, governor La Ganesan chuan March 20, chawhma dar 9:30-a assembly session neih tur hian a ko a ni.

Session chhung hian House speaker thar tur thlan a ni dawn a, MLA tharte rinawmna thu tiamtira lakluh an ni dawn bawk. Session ṭanni hian Governor-in thu a sawi ang a, governor thusawi chungchanga debate-te neih niin, March 27-ah budget pharhin sawiho a ni zui bawk ang.