Assam finance minister Ajanta Neog chuan inthlan dawna BJP-in a lo tiam tawh angin, sorkar hnathawk nuai 1 lakna turin state sorkar chuan a ṭul angte a buaipui mek a ni, a ti. May thlaah chuan thawktu hi 40,000 tal lak thar hman an tum tih a sawi. 
Minister chuan a hmain post 40,000-a thawktu lakna tur an tihfel tawh thu a sawi bawk. 
Assembly session neih mekah independent MLA Akhil Gogoi zawhna a chhannaah minister Neog chuan, " Hna thawk nuai khat lak belhna tur hi buapui mek a ni a, a ṭul angte tihfel a nih hnuah a tahtawlin appointment hi pek an ni ang," a ti. 
Raijor Dal president Gogoi erawh chuan BJP hian sorkar an siam aṭanga kum khat chhunga sorkar hna thawk nuai khat lakbelh a tiam chu tun thlengin a la tihlawhtling lo tih a sawi a ni. CPI(M) MLA Manoranj Talukdar pawhin Minister chhanna pek dan chu a lungawi thlak loh hle tih sawiin, BJP hian kum hnih dawn sorkar an siam tawh a, mahse an thutiamte chu an la tihlawtling lo a ni, tiin a sawi ve bawk. 
District 9-a cabinet meeting neihna atan Rs vbc 3.68 seng
Session neih mekah Congress MLA Kamalakhya Dey Purkayastha zawhna chhangin, minister Ranjeet Kumar Dass chuan district pakuaa cabinet meeting neihna atan state sorkar chuan Rs vbc 3.68 a seng tih a sawi. 
Chief minister Himanta Biswa Sarma kaihhruai sorkar hian kum 2021, September thla aṭang khan cabinet meeting hi district hrang hrangah an nei ṭhin a ni. 
Minister Dass chuan Haflong-a cabinet meeting neih chu senso tamna ber a ni tih sawiin, Rs 1,13,92,399 sen a ni tih a sawi. Bongaigoan-a meeting neihna atan Rs 55,54,034, Jorhat-ah Rs 48,42,173, Dibrugarh-ah Rs 35,15,912 leh Kamrup Metropolitan district-a cabinet meeting neihnaah Rs 21,79,129 sen a ni, a ti.