Sikkim sorkarin fa pahnih neite thla tin Rs 5k, pathum nei Rs 10k pe dawn

Sikkim sorkar chuan an state chhunga hmeichhia, sorkar hna thawk ve lote chu an fate enkawlna turin thla tin chhawmdawlna a pe dawn.

Chief minister Prem Singh Golay chuan nu, sorkar hnathawk lote hnenah an fa enkawlna tur hian fa pahnih nei chu thla tin Rs 5,000, fa pathum nei chu thla tin Rs 10,000, kum khat chhung an pe dawn tih a puang.

CM chuan an state-a mihring punna a ṭhat chhoh theihna tura sorkarin scheme a siamte leh, hmeichhiate chhawmdawlna tur a siamte hi a puang a, heng zingah hian vitro fertilization (IVF) ti turte sum lama puihna te; nu, sorkar hnathawkin nau a neihin kum khat chhung maternity leave pek te, sorkar hnathawk zinga fa pakhat aia tam neite increment pekte a tel.

Golay chuan state sorkarin women's college din a tum tih pawh sawi bawkin, he college hi an state-a hmeichhe hmingṭha tak hming chawitir a ni ang, facility ṭha leh pawimawhte dahin, hostel pawh siam tel a ni ang, a ti. State police atan mi 1,000 lak thar an nih tur thu leh, hmeichhe puala 33% dah ṭhin chu 50%-ah tihpun a ni dawn tih a sawi bawk. Hei bakah hian skilled youth startup scheme hnuaiah hmeichhe entrepreneur-te chu subsidy 50% ah tihsan a ni bawk ang, a ti. Scheme hnuaiah hian subsidy hi 35% pek an ni ṭhin a, beneficiary 1,600 chuang an awm tawh a ni.