Meghalaya-ah 'micro-containment zone' siam dawn

Meghalaya sorkar chuan hripui leng vanga Shillong khawpui chhunga containment zone eng emaw puan chhunga chengten harsatna an tawh phah avangin, mipuite harsatna tihziaawmna turin zone huam chin sawr zim a, 'micro-containment zone' siam a tum. 

Deputy chief minister Prestone Tysong chuan health department-in containment zone chungchangte a sawifiah hnuah he thutlukna hi sorkar chuan a siam ta tih a sawi. Tynsong chuan, "Hri kai hmuh an nih avanga a veng puma Containment zone-a puan a nih hian a huam chhunga cheng mi eng emaw zatin harsatna an tawh phah ṭhin a ni. Hei vang hian containment zone puan a nih leh dawn pawhin a block emaw, a veng pum emaw ni loin a huam chin zim thei angin tih a ni tawh ang," a ti. Meghalaya-ah hian hri kai enkawl mek 633 an awm a, hri kai enkawl dam mi 264 an awm tawh bawk. 

Meghalaya sorkar chuan Covid-19 kaite enkawlna tura hri kai dam tawhten an thisen var an pek theihna tur, plasma bank chu NEIGRIHMS hospital-a siam dan a ngaihtuah mek. Deputy Chief Minister chuan hemi chungchang hi NEIGRIHMS hospital thuneitute nen pawh zirchiangin, sawiho mek a ni, a ti.