Tripura CM chhungte pahnihin hri an kai CM a inkhung hrang nghal
Tripura chief minister Biplab Kumar Deb chu a chhungte pahnihin Covid-19 an kai avangin Thawhṭanni aṭang inah a inkhung hrang ve nghal.
CM hi a nu, a nupui leh a fate pahnih nen an cheng a, an sample test hnuah an zinga pahnihin hri hi an kai a, mahse tute nge tih erawh a sawilang lo. CM chuan hemi chungchang hi a twitter-ah tarlangin, ama test result chu hriat a la ni lo a, mahse a inkhung hrang nghal tiin a sawi.
MLA pahnih, BJP MLA Ramapadai Jamatia leh IPFT MLA Dhananjoy Tripura te pawhin hri hi an kai tih hriat a ni tawh bawk.
BJP MLA hnenah hriattirna pe
Tripura BJP MLA leh health minister hlui, Sudip Roy Barman chuan Pathianni zan khan Covid care centre a tlawh avangin Covid-19 norms palzutah puh a ni a, hei vang hian West Tripura District Magistrate chuan amah leh midangte himna turin ni 14 chhung sorkarin inkhungna hmun a siamah inkhung hrang nghal turin a hriattir. Mahse Barman chuan zawm a tum lo tih a sawi.
MLA Baman hian Agartala-a a bial chhunga Covid Care Centre-a awm pakhatin social media-ah an awmna hmuna inenkawlna a mumal lo hle nia a post avangin, Pathianni zan khan a tlawh a ni. A kal dawn hian PPE kit nen a inthuam, centre-a awmte chu thei ei turte a sem nghal bawk.
Mahse West Tripura district magistrate, Sandeep Mahatme N chuan MLA hian Ministry of Health and Family Welfare-in Covid Care Centre chungchangah kaihhruaina a siamte palzutah a puh a, centre chhungah hian sorkarin phalna a pek bik leh, damlo te enkawl tura training neite chauh luh theih a ni, a ti.