Assam : HSLC paper leak kaihhnawihah mi 27 man tawh Assamese paper leak vangin MIL subject exam tur ṭhulh leh

Assam-a Class 10 board exam neih meka General Science question paper putruk kaihhnawihah mi 27 man an ni tawh tih police-te chuan Ningani khan an sawi. Hetih lai hian Assamese paper a leak leh vangin vawiina MIL subject exam tur chu sawn a ni leh bawk.

Tun kar Thawhṭanni, March 12-a exam tur, General Science question hi a hma Pathianni zan khan a put ru a, hei vang hian exam tur hi ṭhulh nghal a niin, exam hun tur hi ruat ṭhat leh a ni dawn tih official-te chuan an sawi. He thil thleng hi CIDE in an chhui a, state chhung hmun hrang hrang aṭangin mi 27 man an ni tawh a, an zingah hian naupangte pawh an tel. Mi eng emaw zat thu an zawtfiah tawh bawk.

Director-general of police (DGO) Gyanendra Pratap Singh chuan General Science question paper hi WhatsApp-ah Rs 3,000 te'n hralh a ni tih a sawi a, WhatsApp lama paper ti putrute zawnchhuah kawnga pui turin ngen an ni tawh a ni, a ti.

State legislative assembly session neih mekah, Ningani khan CM Himan­ta Biswa Sarma chuan board exam question paper putru chu a kaihhruai sorkar hlawhchhamna pakhat a ni tih a pawm thu a sawi. He thil thlenga a mawhphurtu ber pawh hriat a ni tawh niin a sawi. Class 10 board exam buai­puitu, Board of Secondary Education, Assam (SEBA) thuam ṭhatna turin sorkar chuan a theih ang angin hma a la zui dawn tih CM chuan a sawi bawk.

General Science paper a leak hnuah, vawiina exam tura Assamese paper pawh a leak leh nia sawi a ni a, hei vang hian vawiina major Indian language (MIL) subject exam turte chu ṭhulh a ni leh vek bawk a, exam hun tur hi puan ṭhat leh a ni ang.

CM Sarma chuan question paper leak chungchanga mawhphurtu zinga mi, Luhit Khabalu HS School center in-charge chuan police-ten thu an zawhfiahnaah General Science bakah Assamese paper pawh a tih leak thu a sawi a ni, a ti. Hei vang hian SEBA hnenah MIL subject exam hun sawn tur hian a ngen tih a sawi bawk.

Paper leak kaihhnawiha police man zingah a ruahmantu ber nia puh, zirtirtu pahnih Pranab Dutta leh Kumud Rajkhowa-te chu an hna aṭangin ban nghal an ni.