Sikkim : Vur tla vanga khualzin tangkhangte chhanchhuak

Indian Army-te chuan East Sikkim-a vur tlak nasat avanga khualzin tangkhang mi 1,000 chuang an chhanchhuak.

Nilaini tlai khan East Sikkim-a Natu La, Tsomgo (Chhangu) Lake leh a chhehvelah nasa takin vur a sur a, khawvawt lam pawh zero level hnuai lamah tla thlain, khualzinte kal velna a nghawng buai phah hle a ni.

Official-te chuan vur tla vang hian motor tlan pawh a harsa a, hei vang hian kawngpui km 15-vela thuiah motor 200 vel leh khualzin 1,000 chuang an tangkhang tih an sawi. Khualzin tangkhangte chhanchhuak tur hian sipaite tirh an ni a, darkar riat chhung hruaichhuah hna thawkin hmun him lamah an hruai a ni. Khualzinte hian awmna tur leh, ei tur, thawmhnaw lum leh damdawi lama enkawlnate pek an ni tih an sawi bawk.