Manipur sorkarin ITSEZ tan Rs vbc 30 a ruahman

Manipur sorkar chuan an state-a ṭhalai lehkhathiam, hna nei lo mi 2,100-te tana hna thawh tur remchang siamna turin, Information and Technology Special Economic Zone (ITSEZ) tan Rs vbc 30 a dah.

Ningani zana chief minister N Biren Singh kaihhruaia cabinet meeting neihah hei hi an rel a ni. State chhunga ṭhalai leh zirlaite tana IT training pe turin trainer 2,000 rawih an rel a ni.

Manipur sorkar hian Imphal aṭanga km 5 vela hla, Mantripukhri-a Information and Technology Park-a ram hectare 10.58 chuanga zauah ITSEZ hi a siam a ni. ITSEZ hian tualchhung bakah pawn lam mi entrepreneur-te mamawh buaipui sakin, hna thawh turte a siam phah dawn bakah state sum lakluhna kawngah pawh a pui thei dawn a ni.

June-ah urban local body leh Panchayat inthlan nei dawn: Cabinet meeting hian June 5-ah Urban Local Bodies (ULB) 26 leh June 26-ah Panchayat inthlan neih turin an rel bawk.

ULB inthlan neih tura chuh tumte tan May 9 thleng nomination paper a thehluh theih dawn a, inhnukdawk duhte tan May 12 thleng hawn a ni ang. June 5, zing dar 8 aṭanga tlai dar 4 thleng vote thlak theih a ni ang a, vote thlak ṭhat ngai a awm chuan June 7-ah neih a ni ang. June 9-ah vote tlate chhiarin result puan a ni ang.

Panchayat inthlan neih turah May 22 thleng inthlan chuh tumte tan nomination paper thehluh theih a ni dawn a, inhnukdawk duhte tan May 26 thleng hun pek an ni bawk ang. June 26-ah vote thlak a ni dawn a, vote thlak ṭhat ngai a awm anih chuan June 28-ah thlak nawn leh niin, June 30-ah inthlan result hi puan tur a ni.