Nagaland-ah hri kai tam ber ni thleng

Nagaland-ah Thawhṭanni khan Covid-19 hri kai hmuh chhuah tam ber ni a thleng a, mi 194 in hri an kai tih hriat belh a ni. A zawnin ni li chhung chu hri kai hmuh thar hi 100 an chuang ziah tawh a ni. 

Hri kai hmuh tharte nen an state-a Covid-19 kai hmuh chhuah hi mi 2,129 an tling tawh. Health minister S Pangnyu Phom chuan hri kai hmuh tharte contact tracing pawh neih nghal a nih thu a sawi. Hri kai zinga 648 chu enkawl dam ni tawhin, a kai mek hi mi 1,473 an awm. Mi paliin hripui hi an thihpui tawh a, hri kai zinga pahnih chu state danga enkawl turin an insawn bawk a ni.