Meghalaya leh Nagaland; Assembly budget session nei ṭan

Meghalaya leh Nagaland-ah sorkar thar hnuaia assembly budget session hmasa ber chu nimin aṭang khan neih ṭan a ni.

Meghalaya :

Meghalaya legislative assembly budget session hian March 28 thleng a awh ang.

Session ṭanni hian governor Phagu Chauhan-a'n House-a thu a sawi laiin Voice of People Party (VPP) MLA Ardent Basiawmoit chuan lo aubuaiin, Govenor chu Hindi ni lo, member-ten an hriatthiam theih vek tur ṭawng hmang turin a phut. Speaker Thomas Sangma chuan Basiawmoit hi ṭhu tur leh, Governor thusawi lai tibuai lo turin a khak zui bawk.

Mahse Basiawmoti chuan a ṭanchhan sawifiah zuiin, inkaihhruaia ang chuan Assembly-a thiltihte chu English-a leh zel a ni tur a ni, a ti. "Governor hnenah hian Meghalaya chu Hindi ṭawng hmanna state a ni lo tih hrilh ka duh a ni. Assam sorkar aṭanga kan inlakhranna chhan pawh Assam sorkarin official language-a Assamese hman tir a tum vang a ni. Hetiang thil hi thleng nawn tawh lo se ka duh," tiin a sawi.

Speakr-in a khap hnuah VVP MLA-te chuan Speaker chu an thil phut a ngaihthlak sak duh loha puhin, lungawi loin House aṭangin an chhuak zui a ni. "Sorkar laipui chuan Hindi ṭawng hmang governor a rawn dah a, a thusawite kan hrethiam lo a, Hindi-a thu a sawi lui hi min hmusitnaah kan ngai a, kan awm ve thei lo a ni," an ti.

Session chhung hian ni sarih rorelin, ni nga chu government business leh ni hnih chu private member business ngaihtuahna atan dah a ni. Chief minister, finance changtu ni bawk Conrad K Sangma chuan March 23-ah state budget a pharh ang.

Nagaland :

Nagaland legislative assembly budget session, ni kua awh tur chu nimin khan ṭan a ni bawk.

Session ṭanni hian protem speaker Mhathugn Yanthan chuan MLA thlan tharte rinawmna thu tiamtirin a lalut a, House speaker atan Nationalist Democratic Progressive (NDPP) leh Bharatiya Janata Party (BJP) ṭangrual sorkar, People's Democratic Alliance (PDA) nominee Sharingain Longkumer thlan a ni.

Vawiinah governor La Ganesan chuan House-ah thu a sawi dawn a, governor thusawi hi Ningani leh Zirtawpniah sawiho a ni ang.

Chief minister leh finance changtu, Neiphiu Rio chuan March 27-ah budget 2023-24 a pharh dawn a, a tukah pass nghal tum a ni.

Session-ah hian kum 20 dawn hnua urban local body inthlan neih tur chungchang pawh an sawiho rin a ni. State election commission chuan urban local body inthlan neih hun atan hian May 16 a lo ruat tawh a,mahse tribal pawl ṭhenkhat leh municipal body pathum - Dimapur, Khoma leh Mokokchung bakah Congress leh NPF chuan inthlan buatsaih tur hi an duh lo a, inthlan neih hmain Nagaland Municipal Act, 2001-a section ṭhenkhat siamṭhat leh, hmeichhiate puala 33% reservation siamfel phawt an phut.