ECI full bench-in Assam tlawh dawn

Election Commission of India (ECI) full bench, chief election commissioner (CEC) Rajiv Kumar leh election commissioner pahnih - Anup Chandra Pandey leh Arun Goel awmna chuan March 26-28 hian Assam state an tlawh dawn.

ECI team hian state chhunga assembly leh parliamentary constituency-te siamṭhat tum chungchangah Assam hi an tlawh dawn a, stakeholder hrang hrang, political party leh civil society aiawhte pawh an kawm ang.

Assam-ah hian delimitation exercise hna hi kalpui ṭan a ni tawh a, CEC-in an tlawh hnuah, tun thla tawp lamah tihfel theih beisei a nih thu official-te chuan an sawi.

Nikum December 21 khan Assam cabinet chuan district palite chu a hmaa an lo awm tawhna district nen chhunfin a rel a ni. Biswanath chu Sonitpur ah, Hojai chu Nagaon ah, Tamulpur chu Baksa ah leh, Bajali chu Barpeta district-ah chhunfin tura tih an ni. He thutlukna siam hnu lawk, kumin January 1 khan Election Commission chuan Assam-ah administrative unit thar din a khap zui ve bawk.