Nagaland MLA-te ‘All Political Parties Lobby’-ah ṭhu vek

22nd March, 2023

Nagaland chief minister Neiphiu Rio kaihhruai sorkar thar hnuaia Assembly chu eptu awm lohna house tia puan la ni chiah lo mah se, MLA thlan thar 60-te chu an vaiin ‘All Political Parties Lobby’-ah an ṭhu ho vek.

Thawhṭanni khan sorkar thara Assembly session hmasa ber ṭan a ni a, assembly ṭan ni aṭang hian MLA-te hi an ṭhu ho vek. An zingah hian Nationalist Democratic Progressive Party (NDPP) leh Bharatiya Janata Party (BJP) ṭangrual sorkar, People's Democratic Alliance (PDA)-a mi ni lo MLA 23-te pawh an tel a ni.

House-ah hian a hma chuan rorellai leh eptu lam ṭhutna turin, Ruling lobby leh Opposition lobby siam a ni ṭhin. Mahse tun ṭumah hian PDA-a tel lo political party dangte pawhin ṭangrual sorkar hi an thlawp dawn tih an sawi vek avangin, eptu lam ṭhutna siam loin ‘All Political Parties Lobby’ tia vuah a ni ta zawk a ni.

Chief Minister hian kar liam ta kartawp khan MLA tharte hi meeting neihpuiin, a kaihhruai sorkar chu eptu pawl awm lohna sorkar tia puang tur chuan an thawhpui, BJP-in central lama an hotute aṭanga pawmpuina an hmuh ve phawt a ngaih tur thu a sawi. PDA party ni ve lote'n Naga political talk chungchang, urbal local body inthlan neih tur, women reservation leh delimitation chungchang a huhoa ngaihtuah an rawtna a pawmsak bawk.

State assembly inthlan neih zawh takah khan NDPP-BJP thawkdun, PDEA hian seat 37 an la a ni. A bak seat 23 hi political party dangin lain, NCP-in seat 7, NPP 5, LJP (Ram Vilas), Naga People's Front (NPF) leh RPI (Athawale) in seat hnih ṭheuh, JD(U) in seat khat leh Independent-in seat 4 an la a, PDA party ni lo zawng pawh hian Rio kaihhruai sorkar an thlawp thu ziakin an thehlut a ni.

Kum 2015-a eptu party MLA pariatten hetih laia NPF kaihhruai Democratic Alliance of Nagaland (DAN) sorkar an thlawp khan Nagaland-ah hian eptu awm lohna sorkar hmasa ber a ding a, kum 2021-a Naga peace talk neih chu rang zawka chinfel a nih theihna turin political party zawng zawng telna, United Democratic Alliance (UDA) sorkar din a lo ni tawh bawk.