Sorkar laipui aṭanga Bonus dawng zingah Meghalaya a tel

Meghalaya chief minister Conrad K Sangma chuan sorkar laipui aṭanga bonus, additional fund dawng state tlemte zingah Meghalaya a tel tih a sawi.

Meghalaya hian state chhunga project leh scheme hrang hrang ṭha taka a kalpui avangin, sorkar laipui chuan Capital Investment Fund (CIF) aṭangin bonus Rs vbc 300 a pe tih CM chuan chanchinthar lakhawmtute a kawmnaah a sawi a ni.

Chief Minister chuan, "Sorkar laipui hnenah project leh scheme thawhna tura 2022-23 atana fund pekte chu kan hman zawh tawh thu ka hrilh hnuah, an sanction aṭanga 50% chu min pek belh leh ta a ni. A tirah Rs vbc 600 kan dawng a, additional fund atan Rs vbc 300 a rawn sanction leh ta a ni," a ti.

Tun hnaia Delhi a zin chungchang pawh sawiin, Chief Minister chuan, "Chief Minister term hnihna atana lakluh ka nih hnuah, central lama hotute tlawh a, kum nga liam ta chhunga Meghalaya sorkar an thlawpna anga sorkar thar pawh hi an thlawp chhunzawm zel theihna tura zu biak kha thil tihtur ṭul niin ka ngai a ni. Ka zinnaah pawh hei hi kan sawiho ber a ni bawk," tiin a sawi.