Meghalaya : Ruihhlo kaihhnawih thubuai 726 ziak lut, mi 1,330 man an ni

Meghalaya chief minister Conrad K Sangma chuan an state-ah ruihhlo kaihhnawih thubuai 726 ziahluh a nih thu leh, mi 1,330 man an nih tawh thu a sawi.

Assembly session-a Governor thusawi chungchang debate an neihah, Chief Minister chuan an state-a ruihhlo do kalpui zel a nih chungchang sawiin, ruihhlo do hna khauh zawka kalpui leh, ruihhlo zuarte hremna na zawk pek theihna tur, ‘Prevention of Illicit Traffic in Narcotic Drugs and Psychotropic Substances Act’ chu Home Department lamin an buaipui mek tih a sawi bawk.

Ruihhlo ngaite enkawl dan chungchangah, centre siamtu NGO leh pawl hrang hrangte chu sorkarin inbiakna a neihpui thu te, centre-te tihchangtlunna turin sorkarin infrastructure leh sum lama a puih theih dante pawh ngaihtuah ho a nih thu a sawi. Ruihhlo do hna thawhna leh, ruihhlo ngaite enkawlna kawngah civil society, a bikin kohhran leh NGO-te an inrawlh chu thil ṭul leh pawimawh tak nia a ngaih thu a sawi a ni.

Voice of the People Party (VPP) MLA Ardent M.Basaiawmoit pawhin thu sawiin, an state-a ruihhlo hluar zel tihtawp a nih theihna turin ruihhlo tawlhlut leh zuar ṭhinte hremna, hun rei zawk jail tantir an nih theihna tura ruahmanna siam a rawt ve bawk. Basaiawmooit chuan ruihhlo ngawlveina laka ṭhalaite ven leh chhanhim tuma state police-te hmalakna fakin, hemi rual hian ruihhlo zuarte hremna na tak siam a ṭul thu a sawi. "Police-ten ruihhlo tawlhlut leh zuartu an mante bail-a an chhuak leh mai ṭhin kan hmu fo a, hengte hian a thiltih ngai bawk hi an tichhunzawm leh ṭhin. Hei hi kan tihtawp a ngai , dan khauh tak hnuaiah hun rei tak jail-a tantirna tur siam a ngai. An thiltihsual man hi an tuar ngei a ngai a ni," a ti.

VPP MLA chuan NGO leh pawl hminga siam ni lo, sorkar hnuaiah ruihhlo ngaite enkawlna, rehabilitation centre siam a ṭul thu a sawi bawk.