Bharat Gaurav train-in vawiinah Guwahati thleng dawn

Hmarchhak state tlawhkual tur, Bharat Gaurav Deluxe AC tourist train chuan vawiin hian Guwahati a thleng dawn.

Train tour nei tur hian March 21 khan Delhi-a Safdarjung rel station a chhuahsan a, ni 15 hun an hmang dawn a ni. Hemi chhung hian khualzinte hi Assam-ah Guwahati, Sivasagar, Furkating leh Kaziranga, Tripura-ah Agartala leh Udaipur, Nagaland-ah Dimapur leh Kohima bakah Meghalaya-ah Shillong leh Cherrapunji te tlawhpui an ni ang. April 2-ah Cherrapunji aṭangin khualzinte hi Guwahati station-ah hruaiin, relin Delhi lamah an kir leh dawn a ni.

Deluxe AC train-ah hian dining restaurant pahnih leh choka a awm a, pindan chi thum - AC I, AC II leh AC III awmin, CCTV camera, electronic safe bakah pindan tinah security guard dah an ni bawk.