Arunachal Christian Forum-in tihdam rawngbawl khapna sawisel

Arunachal Christian Forum (ACF) chuan Upper Siang deputy commmissioner (DC) in vantlang hmuna tihdam rawngbawlna, healing programme neih khapna thupek a tihchhuah chu an sawisel.

Itanagar-a press conference an neihah, ACF general secretary James Techi Tara chuan he khapna thupek tihchhuah hian Kristian-te rilru a ti na hle tih sawiin, thupek hi sut turin sorkar an phut tih a sawi. Nikum October thla khan state sorkar hnenah ngenna pawh hi an thlen tawh tih a sawi bawk.

Upper Siang DC-in thupek a tihchhuahah hian, sakhua hruaituten mimal leh sakhaw pawl hminga ṭawngṭai tihdam rawngbawl hna leh healing crusade an neih ṭhin chu khap a nih thu a sawi a, hemi chungchanga advertisement tihchhuah pawh a khap bawk.

ACF hruaitu chuan assembly session neih zawh taka state budget 2023-24 an pass-a state chhunga Kristian zirna inte tana fund dah a nih ve loh chungchang pawh a sawichhuak bawk. State sorkar chu an slogan, 'sabka saath sabka vikas' (Together, for everyone's growth, with everyone's trust) chu rualkhai taka kalpui tura phutin, "RSS education establishment tan fund dah a nih laiin, state chhunga institution nei tam ber leh khawtlang rawngbawlna kawngah pawh tha thawh nasa tak Kristiante erawh chu sorkar chuan a ngaihthah thung a ni," a ti.