Meghalaya : Ramri chungchang buaipuitu regional committee din ṭha

Meghalaya chief minister Conrad K Sangma chuan Assam state nena ramri buaina chingfel tura hma an laknaah regional committee an lo din tawh chu member-te ruat tharin, din ṭhat leh a ni tih a sawi.

Chief Minister chuan a hmaa regional committee an lo dina member ṭhenkhat chu tun ṭum inthlanah khan MLA-ah thlan nawn an nih tawh loh avangin, member hi ruat thar leh a ngai a ni, a ti.

CM Sangma chuan Ri Bhoi tana regional committee dinah chuan deputy chief ministr Preston Tyngsong chu chairperson niin, member-ah hian Jirang MLA Sosthenes Sohtun, Nongpoh MLA Mayralborn Syiem, Umroi MLA Damanbait Lamare, Mawhati MLA Charles Marngar, leh Khasi Hills Autonomous District Council executive member Jambor War-te an awm dawn a, Ri Bhoi deputy commissioner chu convener a ni dawn tih a sawi.

West Khasi Hills-a regional committee chu West Shillong MLA Paul Lyngdoh-a'n a ho dawn a, committee member atan Mawkyrwat MLA Renikton Tongkhar, Mawsynrut MLA Methodius Dkhar, Rambrai Jyrngam MLA Remington G Momin, leh District Councils member pahnih - Gigur Myrthong leh Bajop Pyngrope-te ruat an ni. West Khasi Hills deputy commissioner chu convener member a ni.

West Jaintia Hills-ah Sniawbhalang Dhar chu regional committee chairperson-ah dah a ni a, Raliang MLA Comingone Ymbon, Amlarem MLA Lahkmen Rymbui, Mowkaiaw MLA Nujorki Sungoh, JHADC CEM Thombor Shiwat, leh MDC Aiborlang Shadap-te chu member an ni a, West Jaintia Hills deputy commissioner chu convener member a ni nghal bawk.

Sangma chuan regional committee-te hian April emaw, May thla emawah meeting neiin, Assam nena ramri buaina an la neih mek chinfelna tura inbiakna thawh hnihna kalpui dan tur an ngaihtuah dawn a ni, a ti.