Assam journalist-in Ramnath Goenka award dawng

Assam journalist, Tridip K Mandal chuan Uncovering India Invisible (Broadcast Media) category-ah a documentary, ‘Diaries From the Detention Camps of Assam’ vangin Ramnath Goenka award a dawng.

Award dawng tur hi kum 2021 khan puan ni daih tawh mah se, Covid-19 hripui leng vangin award ceremony hi hun rei tak tihkhawtlai a ni. Nilaini khan New Delhi-ah award semna hun hi buatsaih a ni chauh a ni.

Tridip Mandal hian a documentary hi kum 2019, September thla, Assam-a National Register of Citizens (NRC) final list tihchhuah a nih hnua a siam a ni. He documentary-ah hian dan loa ram dang aṭanga lut nia puhin Goalpara detention camp-a awmte harsatna tawh chungchangte a tilang a ni. Camp-a awmte hi a mimal pawhin a kawm kual a, camp chhunga an thil tawnte an lo hrilh hlawm a ni.

Mandal chuan, "Thil thleng ka report satliah ngawt a ni lo a, keimah ngei pawh hi min nghawng ve, kan chunga thil thleng a ni. Ka chhungte pawh Assam NRC list-ah telh an ni lo a, Indian citizen kan nihna finfiah chu kan tan thil khirh tak a la ni zel a, detention camp-a awm mekte pawhin an hlauhthawn a ni," a ti.

Assam sorkarin NRC final list a tihchhuahah hian, dilna thehluttu mi vaibelchhe 3.29 zinga vaibelchhe 3.11 dah niin, mi nuai 19-te erawh telh an ni lo. Mi tam tak paih an nih avangin sawisel pawh a hlawh hle. List aṭanga paih zingah sipai bang, sorkar official, central leh state sorkara mi pawimawh tak tak chhungte pawh an tel. Chhungkuaah pawh ṭhenkhat telh an nih laiin, a ṭhen erawh paih an ni bawk. Sorkar chuan NRC final list-a tel lote tan Foreigner's Tribunal-ah appeal a nih theih thu a sawi. State sorkar chuan Foreigners Tribunal-in ram dang mi, 'foreigner' tia a puan hma chuan list-a tel lo pawh hi tumah hren theih a ni lo tih a sawi.