SPYF-in Gangtok-ah 'Peace rally' buatsaih

Sikkim Progressive Youth Forum (SPYF) chuan Sikkim state-a politics kaihhnawiha buaina leh tharum thawhna thleng ṭhin duh lohna lantirin, Nilaini khan Gangtok-ah 'Peace rally' an buatsaih.

Rally-ah hian eptu party hrang hrang hruaitute an tel a, pungkhawmte hmaah thu an sawi bawk.

Tun hnaiah hian Sikkim-a eptu party lian ber, Sikkim Democratic Front (SDF) worker-te chu mi tu tih hriat lohten beiin, hliam na tak an tuar. SDF head office leh district office-te pawh an bei bawk.

Indian footballer hlui, Hamro Sikkim Party (HSP) president Bhaichung Bhutia pawhin rally-ah hian thu sawiin, "State ralmuang Sikkim ni ṭhin chu kum hnih chhungin tharum thawhna thlen nasatna state-ah a chang tawh. Politics thil vanga pawikhawihna leh tharum thawhna thleng ṭhinte hi kan tihtawp thuai loh chuan, buaina siam ṭhinte hian silaite an la lekchhuak mai dawn a ni," a ti.