Meghalaya sorkarin local artist-te tan OTT platform siam dawn

Meghalaya chief minister Conrad K Sangma chuan local artist leh content creator-ten sum an lakluh theihna turin sorkar chuan OTT platform, 'Hello Meghalaya' tih chu a siam dawn a, hma lak mek a ni, a ti.

Ningania Shillong-a press conference a neihah, CM Sangma chuan local artist leh content creator-te tana sum hailuh theihna tur, OTT platform siamna tur hian state sorkar chuan Creative Industries for 2023-24 hnuaiah budget atan Rs vbc 15 dah a nih thu a puang bawk.

He project hmang hian state chhunga ṭhalai, media, filmmaking leh music video siam lama tuite chuan platform kaltlang hian view-tu an neih tam dan azirin sum an hlawh thei dawn a ni. Sorkar chuan YouTube kalphung ang deuhin, content creator-te sum hlawh tur hi sorkarin a pe dawn a ni.

CM chuan YouTube kalphung ang deuh entawn ni mah se, view nuai khat neih tlin kher ngai ang khan an ti dawn lo tih a sawi. "A view neih ngai zat hi kan titlem ang a, platform kaltlanga sum hlawh pawh a awl thei zawk dawn a ni," a ti. Sorkar chuan hma a la mek a, thla rei vak lo hnuah financial policy leh package-te pawh puan thuai a nih tur thu a sawi.

Sangma hian budget speech-ah ‘Meghalaya International Film Festival’ hmasa ber hlawhtling taka neih a nih dante pawh a sawilang a ni. An state-ah film chang tura mi tam zawk hipluh an nih theih dan tur leh, local film industry tihchangtlunna turin sorkar chuan film policy a siam dawn tih a sawi bawk a ni.

“World-class” Skywalk siam dawn

Chief Minister Sangma hian Shillong khawpuia Khyndailad (Police Bazar) leh Barik Point inkarah world-class Skywalk siam a nih tur thu a lo puang tawh bawk.

CM chuan skywalk hi kea kalte tan kal vel awlsam leh remchang zawkna ngaihtuahin siam tum a ni tih a sawi a, a siamna senso atan Rs vbc 25 ruahman a ni. Hei bakah Shillong khawpui chhung traffic tawt lutuk tihziaawm dan tur pawh ngaihtuahin, blueprint buatsaih mek a ni, a ti. Traffic tawt tihziawmna tur kawng khat atana sorkarin “Shared School Bus System” a siam hnuaiah, Rs vbc 10 sengin bus 30 lei a ni tawh bawk.