Uisa chungchanga a thusawi dan avangin Maha MLA-in Assam CM lakah ngaihdam a dil

Maharashtra MLA Bachchu Kadu chuan uisa chungchanga a thusawi dan avangin Assam chief minister Himanta Biswa Sarma hnenah ngaihdam a dil.

Kadu thusawi dan vang hian a lungawi loh thu Assam CM-in ziaka a hrilh hnuah, Maharashtra chief minister Eknath Shinde pawhin House-ah Assam mipuite chungah ngaihdam a dil ve bawk.

Maharashtra independent MLA, education minister hlui ni bawk Kadu hian an state-a ui chuang, khawlai uite chu Assam-ah uisa an ei ṭhin vangin thawn vek mai tur tiin March 4-a assembly-ah stray dog vanga harsatna thleng ṭhin chungchang an sawihonaah a sawi a ni. Assam-ah chuan ui pakhat chu Rs 8,000 ten a hralh theih tihte a sawi bawk.

A thusawi avang hian Assam chief minister Sarma chuan na takin Kadu hi sawiselin, ngaihdam dil turin a phut. Maharashtra CM Shinde hnenah pawh an state legislative assembly member pakhatin Assam chungchanga mawi lo taka a sawi chungchangah an lawm lo hle tih leh, a thusawi hi sut tura an phut thu ziakin a hrilh bawk.

Kadu lakah hian Assam police station hrang hrangah thubuai ziahluh a ni. Mahse Assam CM chuan House chhunga thusawi a nih avangin police-te chuan Kadu lakah action an la thei lo tih a sawi.