Tipra Motha thil phut chungchangah sorkar laipuiin palai tur ruat dawn

Tripura-a regional party, Tipra Motha chuan Greater Tipraland state hran an phut chungchang zirchiang turin palai a ruat dawn tih union home minister Amit Shah-a'n a sawi tih an tarlang.

Tipra Motha hotu, Pradyot Bikram Manikya Debbarman chuan Amit Shah-in a biak thu leh, an party thil phut chungchang zirchiang leh, chinfel dan ngaihtuah turin March 27-ah sorkar laipui aiawhtu tur an ruat dawn tih a hrilh tih a sawi. Home Minister chuan an duhdan hriatthiampui a, an thutiamah pawh nghet taka a din zel a beisei thu a sawi bawk.

Hetih lai hian Tripura chief minister Manik Saha chuan 'Grater Tipraland state' dinna chu an pawm loh thu kar liam ta khan a sawi leh a, state sorkar chuan tribal-te leh an chenna bialte tihhmasawnna turin theihtawp a chhuah dawn a, state hran phutna erawh an thlawp ngai dawn lo tih a sawi.

Tripura legislative assembly inthlan neih zawh takah khan Tipra Motha hian a ṭum khatna atan assembly inthlan hi chuhin, BJP dawta seat la hnem ber party an ni a, MLA 13 an nei a ni. Tripura Tribal Areas Autonomous District Council (TTAADC)-ah rorellai an ni bawk.