Nagaland district 9 leh police station 16-te 'disturbed area' ah puan chhunzawm

Ministry of home affairs (MHA) chuan Nagaland-a district pakua leh, district dang pali-a police station 16 huam chhung chu ram buai, 'disturbed area'-ah thla ruk dang atan a puan chhunzawm.

Kar liam ta Zirtawpnia thuchhuah a siamah, MHA chuan Armed Forces (Special Powers) Act, 1958-a Section 3 in thuneihna a pek angin, sorkar laipui chuan heng hmunte hi 'disturbed area' ah puan chhunzawmin, sipai hnena thuneihna sang pekna AFPSA chu hman chhunzawm a ni dawn tih a sawi a ni.

Disturbed area-a puan district-te chu - Dimapur, Niuland, Chumoukedima, Mon, Kiphire, Noklak, Phek leh Peren district-te a ni,

District pakua leh police station 16 huam chhungah hian April 1 aṭangin AFSPS hi sorkarin a sut hma chu thla ruk dang hman chhunzawm a ni ang.

Manipur police station 4 aṭangin AFSPA hlip

Sorkar laipui chuan Manipur-a sipai thuneihna sang, AFSPA hman mek chu police station pali huam chhungah a titawp.

April 1 aṭanga AFSPA hlihna turte hi Wangoi, Leimakhong, Namboi leh Moirang police station-te a ni.

Chief minister N Biren Singh chuan sorkar laipui thutlukna siam chu lawmawm a tih thu a sawi a, prime minister Narendra Modi kaihhruainain, Manipur-a BJP sorkar hnuaiah boruak ṭha leh muanawm a awm chhoh zel avangin an tana thil chhinchhiah tlak tak an tawng ta tih a sawi. Manipur-ah hian Imphal Municipal area tel loin hmun dang zawngah kum 2004 khan AFSPA hi hman a ni. Kum 2022, April khan AFSPA hi district paruk chhunga police station 15-ah hlih a ni a, kumin April 1 aṭangin police station pali dangah hlih a ni leh dawn a, police station 19-ah hlih a ni dawn ta a ni.

Hemi rualin Manipur governor Anusuya Uikey chuan heng police station 19 tel lo, state chhung hmun dang zawng chu April 1 aṭangin thla ruk chhung atan disturbed area-ah a puang nghal bawk.