Nagaland Dy CM-in bodyguard atana police dah titlem turin hrilh

Nagaland deputy chief minister Yanthungo Putton chuan state police hotu hnenah bodyguard atana police dah chu titlem turin a hrilh a, hei bakah hian ruihtheihthil ti ṭhin police-te chungah action la turin a hrilh bawk.

Home department changtu, Patton chuan Kohima-a police headquarters-a senior police officer leh unit commander-te meeting a neihpuinaah he thu hi a sawi a ni. Meeting-ah hian DGP Rupin Sharma leh additional DGP pahnih, RP Kikon leh Sandeep Tamgadge te pawh an tel a ni.

Dy CM chuan Nagaland police zinga 3,000 dawn chu bodyguard emaw, non-police duty lamah emaw chhawr an ni tih sawiin, dan kengkawh tura mi tam tak mamawh a nih avangin hetianga thil danga chhawr zat hi tihtlem a ngai tih a sawi. Police-te chu dan kengkawh a, khawtlang himna leh muanna atana thawk tur a ni a, an lakah mipuite pawhin beiseina sang tak an nei ṭhin a ni, a ti. Hetih lai hian police zingah zu leh ruihhlo ti an awm fo a, heng hian police force pum hming an tichhia a, heng mite hi hremna na tak pek an ngai a ni, a ti.

Nagaland police awm zat chu kum 1980 chhoah mi 1,000 vel aṭangin 2023-ah chuan 26,000 an tling chho tawh tih Patton chuan a sawi a, department pawh tihchangtlun leh thuam ṭhat chhoh zel a ngai tih a sawi bawk.