Meghalaya CM-in VIP nihna dik lo taka hmangte chungah action lak a tiam

Meghalaya chief minister Conrad K Sangma chuan VIP zingah an nihna dik lo taka hmangte chungah action lak a ni zel dawn tih a sawi.

Chief Minister chuan Meghalaya-ah category hrang hrangah VIP 103 an awm thu Thawhṭannia Assembly inkhawmah a sawi. VIP zingah hian Z plus caterogy-ah mi 2, Z caterogy-ah mi 10, Y catergory-ah mi 19 leh X category-ah mi 72 an awm. VIP hrang hrangte hnena security pek danah ministry of home affairs (MHA) kaihhruaina zawm a nih thu CM chuan a sawi bawk.

Nongkrem MLA Ardent Basiawmoit chuan VIP leh an kawppuite zingah motor-a tinted glass (sun-control) leh siren hmang ṭhin an awm chu a ngaimawhawm thu sawiin, vantlang hmuna car, number plate pawh nei lo, sun-control hmang bawk an awm chu mipuite tan pawh a him lo thei tih a sawi. Hei vang hian sorkar chu a ṭul anga hma la turin a ngen a ni.

CM pawhin VIP nihna dik lo taka hmangte chungah action lak ngei tiamin, hetianga ti awmte chu sorkarah hriattir ṭhin turin member-te a ngen.

Motor horn tihrin theih chin tihhniam tum

Meghalaya deputy chief minister, Transport department changtu ni bawk Sniawbhalang Dhar chuan motor horn tihrin theih chin bithliah, decibel limit aia sanga tiri leh, multi-horn hmangte hrem an ni dawn tih a sawi.

Deputy Chief Minister hian Mylliem MLA Ronnie V Lyngdoh-a'n Motor Vehicle Act chungchanga a zawhna a chhannaah hei hi a sawi a ni. Lyngdoh chuan motor lian, zan lama tlante chuan zan reiah an horn-te tiri vakin, kawngpui dunga cheng mi tam tak a tibuai ṭhin tih a sawi. Horn rin zawng phal chin baka tiri-te chungah Transport department-in eng angin nge hma a lak tih leh, dan bawhchhiate hi hremna pek an ni em tihte a zawt. Hei bakah hian motor-a silencer/muffler vuahte chungah action la turin sorkar chu a ngen nghal bawk.

Sniawbhalang Dhar chuan Central Motor Vehicle Rules 1989-a Section 119 (2) chuan horn rin zawng chungchanga motor chi hrang hrang a huam vek tih sawiin, he dan hnuaiah hian motor horn rin lam hi 93 decibel (dB)- 112dB inkar tur a ni.