Assam leh AP minister-ten ramri chungchang sawiho

Assam leh Arunachal Pradesh minister-te chuan Guwahati-ah meeting neiin, state pahnihten ramri chungchanga buaina an neihte an sawiho.

Assam education minister Ranoj Pegu chuan, Pathianni khan Assam Administrative Staff College-ah Assam-Arunachal Pradesh Border Regional Committee Meeting hi neih a nih thu sawiin, ramri buaina neih mek chungchanga inremna ngelnghet siam dan turte an ngaihtuah tih a sawi.

Meeting hi Assam minister Jayanta Malla Baruah leh AP minsiter Tumka Bagra-ten an kaihruai a, ramri buaina an neihin a huam chhunga district MLA-te pawh an tel bawk. Meeting hi darkar 5 zet an nei a ni.

State pahnih chief minister, Himanta Biswa Sarma leh Pema Khandu-te pawhin ramri buaina chungchangah inbiakna lo nei tawhin, buaina chinfel dan ngaihtuah thuai tiamin nikum July 15 khan Namsai Declaration pawh an lo ziak tawh a ni. A hmaa ram an inchuh huam chhhung khaw awm zat, khaw 123 ni ṭhin chu khaw 86 chinah an bithliah thla bawk.