Nagaland : Tribal pawl-ten ULB inthlan boycott-ah vau

Nagaland-a tribal pawl chuan Nagaland Municipal Act 2001 ennawn leh siamṭhat an phut chungchang chu ngaihvensak an nih loh chuan, May 19-a urban local body (ULB) inthlan neih tur chu boycott-ah an vau.

Thawhṭanni khan Tribal pawlte hian Kohima-a Commissioner Guest House-ah consulative meeting an nei a, hetah hian Nagaland Municipal Act 2001 chu Act mawngpawp tiin, Article 371-A palzutna lam hawi he Act-a party/section awm chu ennawn leh siamṭhat an phut tih an sawi. Act siamṭhata “Land and Building Taxation”, “Scheduled Caste” leh section danga 'omission/omitted' tih thu hman chu 'deletion/deleted' tia thlak an phut. Hei bakah hian chairperson office, hmeichhe tana reservation siam chu pawm theih a ni lo tiin, elected member-te chuan chairperson tur hi Scheduled Tribe Indigenous Inhabitant aṭangin an duhzawng, mipa pawh hmeichhia pawh democracy kalphung dik takin an thlang zawk tur a ni, an ti bawk.

Tribal pawlte chuan hmeichhiate tana seat 33% dahsak chu eng chen nge a huam dawn tih chiang taka sawi turin sorkar an phut a, reservation siamsak hian term hnih aia tam a huam tur a ni lo, an ti. "Nagaland Municipal Act 2001 hi ennawn leh siamṭhat a nih hma chuan ULB inthlan hi ṭhulh rih tur a ni. Sorkarin kan thil phutte hi a tihlawhtling lo a nih chuan, tribal hoho-te chuan ULB inthlan lo awm tur hi kan boycott a ngai dawn a ni," tiin an tarlang.